الأربعاء، 17 فبراير 2010



خوكم، قصّة اون لاين، نسمع برشة الأذاعة في السيّارة . تلقاني نسوق و الراديو خدّام. هاو RTCI (قناة تونس بالفرنسية) هاو إذاعة تونس،هاو المنستير و الا إذاعة "موزاريق"(MOSAIQUE FM ) أو FRANCE INTER و EUROPE1 أو حتى إذاعة الجزائر1 . و اللي يكسّرلي البطاطا نلويلو عنكوشو و نبدّل المحطة.

البارح مع الخامسة و 40 دقيقة و في قلب دعزقة متاع "سيركيلاسيون" في باب بنات، حطّيط "إذاعة الشباب" التونسيّة. لقيت حصّة اسمها "وصلات تونسية" تنشّطها مذيعة اسمها "ليليا". كانت تتناقش مع المغنّي أحمد الماجري. حكاية "خر" طر" تعاودت فيها كلمة "الأبداع" 530 مرّة و كلمة "حلوّة" 8361 مرّة. قالك وزارة الثقافة عطاتو دعم، عمل بيه REMIX "حلو برشه" تشاركو فيه هو و "DJ DANGER" . و قعد يحكينا على الروائع اللي كتبهملو "الشاعر الكبير حسين المحنوش". خلافا لعادتي الحميدة، قعدت وخيكم نتبّع في العقّار الأزرق اللي قاعد يتبث حتى قالت المذيعة :

--- معانا على الخط "...الشاعر الكبير حسين المحنوش..." ...آش باش نقوللكم ...أنا في العادة ضغط دمّي 7/12 ...صدقوني لوكان قست الدم راني لقيت 11/25 و انفجرت...الشاعر الكبير!!!! ما قالتش "ناظم الكلمات" و الا "الشاعر الغنائي" و ملحّن أيضا ... فكّرتني ب"الشاعرة" حنان قم و"الشاعر سعيد بن يوسف" (هنا)...يظهرلي اللي المنشطين في التلفزات و الأذاعات في تونس يختاروهم عمدا من الناس اللي عمرهم ما قرؤا كتاب في حياتهم و ما عندهم حتى زاد ثقافي او معرفي و يعطيوهم تعليمات باش الدقاز(المنجم) BAC-4يسموه "دكتور" و فلكي و "الوانمان شو" يردّوه مسرحية و كاتب كلمات الأغاني شاعر و كبير.

على الدزّه هاذي BAUDELAIRE و البياتي وARAGON و الشابي و NERUDA و الهمّامي و المختار اللغماني ونزاز قباني و...و... شنوّه؟... بيّاعة ملاوي؟

اش بيه في الدول المتحضرة (اللي فيها الديمقراطية و اللي رخص الأذاعات تسند بالقانون) تلقاهم يسميو صاحب كلمات الأغنية "PAROLIER" و الا "LYRICS :" و عمرو SERGE LAMA و الا EROS RAMAZOTTI اللي كتبو كلمات عشرات الأغاني في حياتهم ما قالوا أحنا "شعراء".

يبدولى اللي العملية هاذي ممنهجة و هدفها تبهيم و غسل أدمغة أكبر عدد ممكن من الشعب التونسي و تصحير الساحة الثقافية و تعميم الجهل .

و قبل ما توفى الحصّة شيختها "ليليا" و عدّات رائعة من روائع أحمد الماجري(ما تختلفش برشة على هاك القسيم اللي ألفتهولكم في تدوينتي (هنا) و اللي يقول "حبّيتني و حبّك شعّل سامور في جاشي...راني ملكوع و منك ما نبراشي"...)تقول غناية الماجري :

أحلى من الكلّ ...أجمل من الكلّ ...لكن مجروح...يا روح الروح...و بيدّك الحلّ...



تعليق rami

كان الروائي مصطفى الفارسي يقول:
ثمّة شعر و شعير،و الشعير يعطى للحمير



تعليق غير معرف

شيء كبير هالغناية! و النصّ متاعها ما فمّاش كيفو في الشعر التونسي!!!