الخميس، 18 فبراير، 2010



أَبْ أَبْ أَبْ عَالدِّيمُقْرَاطِي... إِلِّي إِتْغَرْمُو بِيهْ إِيهِيمُو...

مَلَّهْ فَلْتَهْ دِيمُقْرَاطِي... فِي التَّرْبِيجَهْ إِيڤُولُو الدِّيمُو...

لاَ إِتْشَاطِي إِمْعَاهْ... أُو لاَ إِتْبَاطِي...

هَوَ السَّيِّدْ... و إِنْتِ إِخْدِيمُو...

أَبْ أَبْ أَبْ عَالدِّيمُقْرَاطِي...

أَبْ أَبْ أَبْ عَالدِّيمُقْرَاطِي... يَعْشِقْ صُنْدُوقْ لِنْتِخَابْ...

إِتْرَشَّحْ ضُدّْ الدِّيمُقْرَاطِي... إِيڤُلِّكْ بَرَّهْ حِلْ إِكْتَابْ...

هُوَ إِلْعَالِي إِنْتِ إِلْوَاطِي... هُوَ الرَّابِحْ فِي الْحْسَابْ...

أَبْ أَبْ أَبْ عَالدِّيمُقْرَاطِي...

أَبْ أَبْ أَبْ عَالدِّيمُقْرَاطِي... مِتْشَبَّعْ بِالْحُرِّيَّاتْ...

هُو إِلِّي إِيدَاوِيلِي إِحْبَاطِي... وِدْوَايَا فَجْعَهْ وِسْكَاتْ...

إِمْلَجِّمْ مِتْوَحِّشْ أَعْيَاطِي... شَاهِي نِمْشِي إِفْ مَسِيرَاتْ...

إِمْكَتِّفْ مَغْلُولْ فِي إِرْبَاطِي... إِنْڤُلُّو أَعْطِينِي إِيڤُلِّي هَاتْ...

أَبْ أَبْ أَبْ عَالدِّيمُقْرَاطِي...

أَبْ أَبْ أَبْ عَالدِّيمُقْرَاطِي... فِي الْڤَاتْ إِلْكُلْ إِيحِبُّوهْ...

مَلاَّ أُوحَيِّدْ دِيمُقْرَاطِي... كِي إِيخَوْصِصْ مَا فَمَّاشْ خُوهْ...

مِنُّو إِنْخَافْ أَعْلَى صَبَّاطِي... عَالْغَفْلَهْ إِيهِزُّو إِيبِيعُوهْ...

رَاسْ الْخَدَّامْ رَدُّو إِمْطَاطِي... إِكْلُوهْ إِلْحَمْ أَعْظَمْ بَاعُوهْ...

أَبْ أَبْ أَبْ عَالدِّيمُقْرَاطِي...

أَبْ أَبْ أَبْ قَدَّاشْ أَحْنِينْ... قُتْلِكْ رَاهُو دِيمُقْرَاطِي...

إِيرَقِّدْنَا.. إِيقَرِّرْ فِي إِلْحِينْ... نُصّْ إِلْلِّيلْ لاَ حَدّْ إِيطَاطِي...

لاَ كِلْمَهْ إِدَّغْدِغْ وِذْنِينْ... إِتْقُولْ إِقْطَاطِسْ وُسْطْ إِبْتَاتِي...

وِيذَا حَلِّيتْ إِلْعِينِينْ... مَحْلَى الضَّرْبْ فِيكْ إِمْوَاتِي...

أَبْ أَبْ أَبْ عَالدِّيمُقْرَاطِي...

أَبْ أَبْ أَبْ أَحِّيتْ مَا حَرَّهْ... يِزِّي رَاهُو دِيمُقْرَاطِي..

ضُمْ إِلْفُمْ إِتْهَادِنْ شَرَّهْ... غَمِّضْ عِينِيكْ أُو قُولْ خَاطِي...

نَسِّي إِلْسَانِكْ يُخْرُجْ بَرَّهْ... أُو ڤُولْ هَكَّاكَهْ أَعْطَانِي إِلْعَاطِي...

أَبْ أَبْ أَبْ عَالدِّيمُقْرَاطِي...

سليم ساسي