الثلاثاء، 19 يناير، 2010



اليوم الصّباح ما نخدمش، خرجت عملت "فوتنغ" و من بعد قعدت نتسكّع في الدّار، طالع هابط يمنة و شمالا... قيس الأراضي...شدّيت التيليكومند و عملت شوية(برشة...) zapping... نطيح pile poil مع(موش على) المنشّطة متاع الحصّة "يللى معانا"(قناة "حنّبعل" التونسيّة) لابسة تي شورت متاع الفريق الوطني التونسي، هاّذيكة اللي تسمّي في العرّاف حسن الشارني " الدكتور الفلكي"* . قاعد أمامها راجل يحكي على البومات المسيرة الغنائّية متاعو. السيد هذا اسمو الفنّي "سمير التونسي"...موش سمير الوصيف...و الاّ الهادي التونسي...كيف الواحد يسمع اش قاعد يقول هالمخلوق... يفهم مدى الكارثة اللي حلّت بهذا الشعب...و خطورة عملية التجهيل و الإستبلاه اللي قاعد يتعرضّلو المواطن من خلال برامج قنوات مثل "حنبعل" ...من مدّة نهارين على نفس القناة و في اطار التخميرة الكرويّة الوطنيّة قال واحد من جماعة " سويعةCAN " ، ترأس من شهور المؤتمر الإنقلابي متاع نقابة الصحافيين، [...فوزي البنزرتي ما ينجّمش يمنعنا من الكلام ...نحن في بلد ديمقراطي... حرّية التعبير فيه مضمونة... ]

طلبت المنشّطة من "المزاودي" باش يغنيلها مقطع من ألبومو الجديد...a capella ...لكن في نفس الثانية وقع بث مسجّل متاع غناية "ليّا ناس..."...قالك الرائعة هاذي من انتاج "الشاعر" و الملحّن سعيد بن يوسف...putain de sa race كيما يقولو اولاد عمّي متاع باريس...كيفاش عمل؟... صحّه ليه "شاعر" و ملحّن في نفس الوقت...هاو الضرب يا بو ..ب. يقول "الرفران" متاع التقتوقة هاذي: "ليّا ناس و عرش صعيب..."

ما نعرفش اذا كان كاتب هالكلمات... و اللي يغنّي فيها ...و اللي بثها ...و اللي يسير في تلفزة "حنّبعل"... يعرفو اللي احنا عايشين في 2010 و الا ça y est…...رجعنا قبائل و عروش.

و بما أنّها متجنّدة لغسل أدمغة الناس و اجتثاث أي حس نقدي عندهم...حبّت الشختورة تكمّل الإستجواب بالكورة و ختمتها بسؤال "اينوجيدابل" : اش قولك سي سمير في ماتش اليوم؟...جاوبها هو: اربعة/ صفر...لا...خلّيهم خمسة و ان شاء الله مربوحة...باش نعطيوهم خمسة...خمسة و خميس...

على أي ماتش يحكيو؟



تعليق غير معرف

ماشي في بالها ماتش تونس /الكامرون اليوم



تعليق كمال

شبيك يا قصّة اون لاين ماكش ذوّاق؟ الكلمات متاع الغناية معبرة.محبوبة الشاعر عملت فيه و جابتلو اخوتها و اولاد حومتها.ياخي هو هدّدها و قاللها عندي ناس وعرش صعيب مثلا "اولاد..." و تولّي كيما الهوتو و التتسي...



تعليق Youssef

أهلا

لا عاد مدام في حنبعل ، هذا موش مستغرب ...
ما يعنيش إنو لخرى خير منها ، هذيكا عندها لسان خشبي بدون منازع أما متع اماليها (إنظر الركن الأعلى على اليمين )
مل لخر ماعندك فالسوق ما تذوق ، المستوى الإعلامي السمعي البصري هزييييل مع توفر الإمكانيات البشرية والمالية ...
اش خير من وثاقي عل "الحوت الأزرق" ونقاش بيزنطي على لون سبادري الحجي ؟

فيما يخص القبلية ، راهي مازلت موجودة ... أما توا تنجم تولي تسميها "الحومية" وللى"حب الجمعية "

يبارك في ترابك يا تونس قداش تدلل وتجيب :)

بالسلامة