و أنا ماشي بمسؤوليّة

كيف نسوق السيارة تلقاني دائما نسمع الراديو...عندي محطّات مبرمجهم لان محتواهم ،خاصة الاعلامي، تحفون rtl,europe1, gr1 ,alger3,و الا اذاعات برامجهم الغنائية باهية : "اذاعة المنستير" rtci . و فمّا قنوات اخرى فارضة روحها. انت تضغط على زرّ تبحث على حاجة... تخرجلك على موجة من الموجات، اصوات او صوت ركيك (ت)ينبح... تقعد زمن طويل تفكّر في معانات الناس اللي مفروضة عليهم هاك الأذاعة صباحا مساءا و يوم الأحد.

البارح الساعة صباحيّة ،التاسعة، و المكان اخضر قرب منزل بوزلفة(الوطن القبلي تونس)السماء صافية و العصافير تزقزق... ضغطت على زرّ...جات صدفة اذاعة الجماهرية (1053 م موجات متوسطة) ...واحد مغط صوتو يوحّش، ينهق في كلمات تافهة مع موسيقى اتفه :

...و أنا ماشي بمسؤوليّة...

...على درب الأمّة العربيّة...

سمعت شويّة و بدّلت الموجة لقيت Cabrel العظيم على rtci...يشرڨع في "بتيت ماري"...ركشت و عملت كيف.

في اذاعات البلدان اللي ما فيهاش حرّيات...فمّى ثعالب تكتب في الكلمات و ذيوبة تخنتب في الموسيقى و زواحف توزّع و تعزف و ناس تتخادم في محطات البث و تقوم بصيانة معدّات شراوها بأموال دافع الضرائب و جيوش من الموظفين يركّو في النوم و الا يشربو في القهوة و هذا الكل... من اجل انتاجات تجهّل و تقمع في وعي الناس وتزيد تكبّلها.

برّه يا مغنّي متاع..." و أنا ماشي بمسؤوليّة "... يعطيك غمّه...