الخميس، 4 مارس 2010


من أيّام قريت على النسخة الألكترونية متاع جريدة "الصباح" (1مارس 2010) مقالة كاتبها واحد اسمو محمد الصالح الربعاوي حول حصّة تلفزيّة تتعدّى كلّ نهار الأحد في 11.30 ليلا على قناة 21 التونسيّة . البرنامج هذا يتقبّل مكالمات من مواطنين حول مواضيع تدور أغلبها حول الحياة الجنسيّة و الأنجابيّة و العلاقات بين المرأة و الرجل...و يجاوبهم اخصّائي (يبدو انّو استاذ في علم النفس)متمكن من كل المواضيع المطروحة و يجاوب في المتصلين بكلّ لطف و دقّة و يرفع في برشة جهل . السيّد اللي كتب في صحيفة "الصباح" موش عاجبو البرنامج !!! قالك "... لان هذا البرنامج تجاوز الخطوط الحمراء في حلقة سهرة الاحد قبل الماضي...". هي deja التلفزة التونسيّة ... ما فيها ما يتشاف ...كمّل على أمّها انتي يا سي محمد الصالح!!! "... فما ذنب العائلات التي تتابع البرنامج مباشرة؟..." قلّي بربي اش كون نصّبك وصيّ على العائلات التونسيّة باش تتكلم باسمها؟ توه على شكون تجدّ هالحكاية متاع هالعائلات القاعدة ،بعد نصف الليل، نهار أحد قدّام التلفزة يا بابا ؟من ايّ حيط جبتها هالخرافة؟ يبدولي أن محمد صالح هذا ما شافش البرنامج حتى مرّة و حكاولو عليه لأنّو يقول في "المقال" : "... فهل ان الغايات التجارية وشد نسبة اكبر من المشاهدين؟ تقفز على كل الأعتبارات الأخرى؟..." يا مواطن ! فين الأعتبارات التجارية؟ البرنامج لا فيه لا sms و لا اشهار و يتعدّى في نصف الليل! يا خي آش تكيّفت قبل ما تكتب مقالتك؟ يظهرلي فيه محمد الصالح عندو برشة مشاكل زعطوطيّة و يرفض انّو الناس تتكلم في الجنس في التلفزة "... ذلك ان اغلب الحالات المتدخلة هاتفيا تمحورت حول الجنس بجزئياته التي لا تراعي طبيعة المجتمع العربي الاسلامي..."

الناس اللي تكلّم في هالبرنامج يا سي الربعاوي أغلبهم ،حسب ما فهمت،جرحتهم الحياة و كبتلهم سعدهم ...ما تزيدش عليهم انتي و سيب عليك من هالقلم ... اسمع كلام خوك ...اكتب مقالات في كرة اليد و الا في زراعة السكّوم...و الا انقد برنامج "المسامح كريم" و الا كيما مستانس على الفنّانين و كيف تاقعلك "بان" اطلب برنامج "همس الليل" توه يعطيوك نصائح باهية...

ملاحظة خارج الموضوع : قريتلك "مقالة" أخرى تحكي على لطفي العبدلّي... يا سي محمد الصالح راهي "مايد ان تونيزيا " متاع لطفي العبدلّي، يسيموها stand-up و الا one man-show ... موش مسرحيّة ...



تعليق غير معرف

اي يه ما دواء الفم الأبخر كان السواك الحار



تعليق Arabasta

ههههه، ماو حسب تصور الصحافي هذا، الأمة العربية الإسلامية ما تمارسش الجنس، باين عمرو ما قرى الكت العربية في الموضوع



تعليق fawzi

j'ai vu ctte emission une fois.les conseils donnés sont de qualité.de quoi se mele l'ignorant de essabah