حكاية فيها "واو"

"المهرجان الدولي للفلم بتونس" FIFT ... عاشت الأسماء يا سيدي... أنا كنت في بالي بيه "مهرجان السينما و الملابس و الموضة بتونس"(الدورة الأولى نوفمبر2007)... اللي ينظموه شركة من فرنسا اسمها "كراون ايفانتس" (مديرها نيكولا بروشي) و وزارة الثقافة بتونس. يقول القايل اش نندبو بيه هالمهرجان ...ماهو عندنا "jcc" و عندنا مهرجان الفلم القصير و مهرجان قليبيه لفلم الهواة...خاصة انٌو شركة crown events و nicolas brochet هاذا ما عندهم في سوق السينما ما يذوقو. جل السينمائيين و النقٌاد زادوا تأكدوا عمناول ان الحكاية فيها "واو" وقتلٌي هالمهرجان تنظٌم السنة الفارطة 6 ايٌام قبل الjcc. و شافو القاوق و الفشتي اللي عملتو وزارة الثقافة لتظاهرة "سينمائية" رئيس لجنة تحكيمها الكسندر اركدي واحد زفت نهار الكل ينوح(خطاب استعماري و عنصري في شريط ( le coup de siroccoعلى الجنٌة المفقودة اللي خرج منها توٌه 50 سنة[الجزائر] و على امٌو العزيزة صهيونستان (o jerusalem) . نيكولا بروشي اللي مهنتو تنظيم الأحتفالات الدعائيٌة جنٌد حويرة people من الصنف الثاني و بعض النجوم السابقة من نوع has been و عمل بيهم "دخلة" قالك باش" نعطي صورة حداثية و جميلة لتونس الخ...الخ...(نورمال و المهرجان تعمل بمناسبة العشرينية) " why not [و علاش لا]... ياخي هو يصرف من مكتوبو؟ آخر نكرة من جماعة هالزفٌة يخلص 5000 يورو باش يورٌي فاتشاتٌو ليلة[ الطيٌارة و المبات خالصين]. عندما تقرأ برنامج الأشرطة اللي باش تتعرض من 24 الى 27 سبتمبر 2009 تبدى تفهم اللي كيما قلت الحكاية فيها "واو" . نوعية متاع سينما incolore,inodore et insipide (عدى شريط the time that remains متاع ايليا سليمان) و مهرجان يراد منٌو حسب ما يبدو تعويض ايام قرطاج السينمائية بتظاهرة رديئة تصفٌي نهائيٌا( و لو على مراحل) اخر ما تبقٌى من تجلٌيات السينما كما برزت في 50 سنة الفارطة في القارة الأفريقية و في البلدان العربيٌة و تعوٌضها بمهزلة متاع صعود مدارج مفروشة بالأحمر ومسرح مزٌين بالموف(اوووووف)...و "الحداثة و الوجه العصري لتونس و ... العودة " (هذيٌة من قريحة سيناريت مسلسل "مكبوب" اسمعتو بوذني يغني في القلم هذا على اذاعة المنستير) الحاصيلو..جاء يقلٌد في خطوة الحمام... تلٌف خطوتو...