علاش حرمتو ولدو من الجائزة الاولى؟

النّاس اللي كانو يستنّاو في نتايج لجان التحكيم متاع jcc استغربو وقتلّي لجنة الأشرطة الوثائقيّة اعلنت حجب الجائزة. اعضاء اللجنة قالو انّو الأفلام المتسابقة 12 و هوما ما شافوا الا 11 فلم.

وين مشى الفلم عدد 12؟ و اش اسمو؟ و شكون مولاه؟ و علاش مشى غبره في السماء؟

ايّا يا سيدي حلّو عينيكم و وذنيكم بالقدى !

الفلم اسمو : "زبد" (ecumes )

المخرجة : ريم علي ( تخدم ايضا ممثلة في بلادها ) من سوريا. هي التحفونة الأتية صورتها

السبب الرسمي لسحب الفلم : لجنة التنظيم متاع jcc ما قالت شيء و عملت black out

السبب حسب العصفورة : تدخّلات رسمية اجنبيّة.

موضوع الشريط : لاهي حكاية تر... و لا اوموسكسوال و لا عصابة تبيع في " كربوناطو"....الفلم يحكي على معاناة سجينة سياسية شيوعيّة في سوريا...( على هذاكا يا بورب مديرة المهرجان بقتت والدين الفلم، حفاظا على الأخلاق الحميدة و مراعاة لمعنويات الشعب التونسيّ و حمايتو من الأفكار الهدّامه ). تصوّروا الجمهور يشوف شريط "زبد"

آش يكون موقفنا مع الدول الشقيقة و الصديقة؟

مخ الهدرة انّو لجنة التحكيم متاع الفلموات القصيرة استرجلت (بنساها و رجالها: نادية كمال المصرية و فيلكس نداي من السينقال و الفلسطينية عليا اورسغلي و رضا الباهي من تونس و الألماني دوويس هنجار) و قالت لا للمقص !

و ما قعدو على التوش كان اشباه المثقّفين اللي قبلو هالعملة المزبّلة :

1- الهيئة المديرة اللي لأول مرّه من عام 1966 تقبل المشاركة في صنصرة فلم

2- المسؤول على قسم الأفلأم القصيرة اللي عامل فيها "سينياست" و قبل باش يزكّي حاجة كيف هاذي ( المرّة الجايه اللي باش يحكي على السنيما ماذا بيه يتأكّد أنّي موش موجود معاه في نفس المكان)

3- السيّد اللي عندو جمعة مقيّم الدنيا في الأذاعة و ال"صحافة" و التلفزة ! قالك ولدو اتحرم من الجائزة الأولى !

اشكون قالو اللي الجائزة كانت باش تتعطى لولدو؟ ما قلقتوش حكاية فلم مصنصر؟

و على العموم راهو موش ريم علي بركه تعاني من الرقابة في سورية. زوز مخرجين كبار، محمد ملص و عمر اميرالاي

تمنعو من السفر للخارج هالأيّامات ( هنا و هنا ) .