خذا القرصة للدجٌاج و قاللو : يا عم الدجٌاج خو اعطي هالقرصة للدجاج. فرح الدجٌاج:الله يكثر خيرك يا عم الفار. و كيما العادة رجع الفرٌادي في آخر العشيٌة و طلب القرصة. الدجٌاج جاء ينعس، و قاللو: موش قتلي اعطيها للدجاج؟ جاوبو الفار: قمحة و شعيرة بلوح دقيق،لوح دقيق بقرصة،قرصة بفلٌوسة. هبل عليه الدجٌاج و طرٌدو. لاكن الفيٌر قعد يرعب في الدجاج حتى فد الدجٌاج و عطاه فلوسه. خذا هاك الفلوسة و مشى بيها لواحد فلاح عندو كوري كبير متاع بقر الجاموس. تمسمر قدٌام الفلاح و قالو : بربي شد هالفلوسه و ربيها مع الجاموس.ضحك الفلاح و جاوبو :فلوسة وسط الجاموسات؟ ماهو تتغفص. يا راجل سبق الخير قالو الفٌير : كان عاشت عاشت و كان رفسوها الله يرحمها. و كيف العادةرجع عمٌك الفار في آخر العشيٌة و طلب فلٌوستو. صاح الفار :قمحة و شعيرة بلوح دقيق،لوح دقيق بقرصة،قرصة بفلوسة،و فلوسة بجاموسة. و بم انٌ الفلوسة مشات ريش نعام. بدى هاك الفلاح يجري في جرٌة الفار يحب يقتلو.الفلاح يضرب و الفار يطلع فوق الجاموسات و يدخل في وذنيهم حتى تعب هاك الفلاح و الجاموسات طالعةهابط باش تهبل حتٌى اتجبر الفلاح باش يعطيه جاموسة. قعد الفيٌر يدور من حومة الى حومة و هاك الجاموسة وراه حتٌى وصل قدٌام دار عرس. دق على دار العرس . و قال لبو العروسة أنا عمٌك الفار نحب نعطيكم هالجاموسة. فرحو جماعة العرس و ذبحو هاك الجاموسة و كلاوها، و عملو عرس ما يتنساش. هوما ما زالو كيف كملو التعليلة و هاك الفيٌر قال صب الزيت :اعطيوني جاموستي شبيكم ذبحتو جاموستي و عمللهم شوهه....شيء ما نفهم، قميحة و شعيرة بلو دقيق، لوح دقيق بقرصة،قرصة بفلوسه،فغلوسة بجاموسة، ...و جاموسة بعروسة...و ما جاء نصف الليل الا و عمكم الفيٌر عروس....
