الاثنين، 27 يونيو، 2011



البارح الأحد العشية 26 جوان هجمت عصابة متاع مرضى و بسيكوبات على قاعة السنيما "افريكارت" في تونس و حاولوا منع عرض شريط لنادية الفاني و شريط " WAITING FOR ABUZEID" كما اعتداو بالعنف على وكيل القاعة الصديق الحبيب بالهادي...

كانوا ينجموا يحضروا العرض و من بعد يقولوا اش يحبوا... و الا ياقفوا قدام السينما و يحتجوا... هذا حقهم ... لكنهم خيروا العنف و الأعتداء.

ولينا نعرفوا توّه... اللي وقت ما تبدى الحكاية فيها سلفيين ... الشرطة ما تجي... كان ما تاكل الدنيا بعضها ( انا تكونت عندي قناعة من مسيرة 1 افريل 2011 ...انو الشرطة... هي اللي تسير فيهم)...

هالزنوس كان لاحضتوا... ما يدوروش باجتماعات و تظاهرات الوطد و البوكت و حزب العمل او حتى النهضة لانهم يعرفوا اش يصيرلهم لوكان يقربوا(يتكوّر بيهم...)

عندي ميساج لصديقي "حبوب" : ...عود يا حبوب كي تبدى عندك دعازق من النوع هذا...كلّم اصحابك قبل...

ماك تعرف...ما يغلب الرطل كان الكيلو...






قضت بالأمس محكمة عسكرية، في المنامة عاصمة البحرين، على المدوّن (*) و الناشط الحقوقي علي عبد الأمام بخمسة عشر عاما سجنا .



الأربعاء، 22 يونيو، 2011




بعد الجدل اللي صار في ما يخص افتتاح مهرجان قرطاج الصيفي من طرف "المناشد" لطفي بوشناق...صرّح وزير الثقافة لقناة تونس 7 اللي الحكاية الكل راهي مجرّد مقترح...

Mon œil يقولوا الفرنسيس...

أنا باش نكون ايجابي هاو نعطي مقترح لوزارة الثقافة باش تعملنا حفلة قمقومة يغنيوا فيها فنانين من اولاد الشعب الكريم ما غنواش في القصور... و ما ناشدوش الدكتاتور... و غناوا بوبلاش لاتحاد الطلبة و لرابطة حقوق الإنسان و لاتحاد الشغل و عمادة المحامين ...و حفات ساقيهم في المظاهرات...و كلاتهم المزيرية...

- فرقة البحث الموسيقي

- بندير مان

- رضا الشمك

- الجنرال

- فرقة جدل

- امال الحمروني و خميس البحري

- ياسر الجرادي

- اجراس

- لبنة نعمان

- الحمائم البيض

- بديعة

- اغاني الحياة

- ماك شوكان

أنا متأكد اللي الحويرة مناشدين اللي لابدين في وزارة الثقافة(ر.ب.ع +م.ر.ف...) و اللي اختاروا زميلهم في المناشدة باش يتفجعوا عند قراءة هذه القائمة...لاكن يلزمهم ينسوا definitely افتتاح بحفلة بوشناق .