ممنوع من السفر
ممنوع من الغنا
ممنوع من الكلام
ممنوع م الاشتياق
ممنوع م الاستياء
ممنوع م الابتسام
وكل يوم ف حبّك
تزيد المنوعات
وكل يوم باحبك
اكثر من اللي فات
حبيبتى يا سفينه
متشوّقه وسجينه
مخبر في كل عقده
عسكر في كل مينا
يمنعني لو اغير
عليكى
او اطير
اليكى
واستجير
بحضنك او انام
في حجرك الوسيع
وقلبك الربيع
اعود كما الرضيع
بحرقة الفطام
حبيبتي يا مدينه
متزوّقه و حزينه
في كل حاره حسره
وف كل قصر زينه
ممنوع من انّي اصبح
بحبك او ابات
ممنوع من المناقشة
ممنوع من السكات
وكل يوم ف حبك
تزيد الممنوعات
وكل يوم باحبك
اكتر
من اللي فات
1976
