بعد الجدل اللي صار في ما يخص افتتاح مهرجان قرطاج الصيفي من طرف "المناشد" لطفي بوشناق...صرّح وزير الثقافة لقناة تونس 7 اللي الحكاية الكل راهي مجرّد مقترح...

Mon œil يقولوا الفرنسيس...

أنا باش نكون ايجابي هاو نعطي مقترح لوزارة الثقافة باش تعملنا حفلة قمقومة يغنيوا فيها فنانين من اولاد الشعب الكريم ما غنواش في القصور... و ما ناشدوش الدكتاتور... و غناوا بوبلاش لاتحاد الطلبة و لرابطة حقوق الإنسان و لاتحاد الشغل و عمادة المحامين ...و حفات ساقيهم في المظاهرات...و كلاتهم المزيرية...

- فرقة البحث الموسيقي

- بندير مان

- رضا الشمك

- الجنرال

- فرقة جدل

- امال الحمروني و خميس البحري

- ياسر الجرادي

- اجراس

- لبنة نعمان

- الحمائم البيض

- بديعة

- اغاني الحياة

- ماك شوكان

أنا متأكد اللي الحويرة مناشدين اللي لابدين في وزارة الثقافة(ر.ب.ع +م.ر.ف...) و اللي اختاروا زميلهم في المناشدة باش يتفجعوا عند قراءة هذه القائمة...لاكن يلزمهم ينسوا definitely افتتاح بحفلة بوشناق .

في حصّة " زوم على الثقافة " اللي تبثها "حنبعل تي في " تكلموا على موضوع افتتاح مهرجان قرطاج الصيفي بحفلة لطفي بوشناق . فمّى وحدة من أبواق الدعاية لبوشناق اسمها كوثر الحكيري، صحافية حسب الحصّة، قالت بالصوت الواضح : " شفت بعيني لطفي بوشناق في التجمع اللي عملوه الفنانين نهار 14 جانفي قدّام المسرح البلدي و كان واقف معاه صلاح مصباح "

هاذي يا كوثر الحكيري كذبة من نوع "الكذب المفلق طاح الكوز و قعد الزيت معلق"...لانّو ما وقعش تجمع للفنانين يوم 14 قدام المسرح...(انت حبيت في نفس الوقت توهمنا انك شاركت في تجمع الفنانين) و يبدولي الحكاية هذه جاية من الحيط ... يلزمك من هنا و صاعدا...اذا تحب الحكاية تتنشر قول مثلا ... اللي العربي نصرة كان معاهم .

تجمع الفنانين، أنا شاركت فيه يوم 12 جانفي،يوم ثلاثاء، في نصف النهار، و كان من بين الحاضرين ،على سبيل الذكر لا الحصر، رجاء بن عمّار اللي فشخوها البوليسية بالضرب و جليلة بكار وسوسن معالج و بسمة العشّي و فاضل الجعايبي و ليلة طوبال و سناء داود و رجاء العماري و جمال المداني و نصر الدين السهيلي اللي البوليس كسرلو يدو(موش المغني... هذكا من التجمع) وغيرهم...

على كل حال... المغنيين الوحيدين اللي شافوهم الناس برشة مرّات في المسيرات و التحركات (في الباساج و بطحاء محمد علي و في ڨابس) قبل 14 جانفي هوما ياسر الجرادي متاع فرقة "ديما ديما" و منير الطرودي و "بندير مان" و رضا الشمك و نبراس شمام متاع "البحث الموسيقي"... أما البقية امسح مات...ضمايرهم ما تبوجي كان بالبحّيمي...

اذن يا كوثر نقّص من الكذب،اولا لان الكذب موش باهي... ثم راهو الناس اللي تكذبوا لصالحهم ما همش باش يدومولكم ... انت جيت تضرب عصفورين بحجرة... ياخي تشديت بالكمشة.

يا كوثر ... قبل ما نختم... اذا تقرأ هاتدوينة اعفي نفسك من الأجابة و النيرفو راهو التصاور متاع الوقفة متاع المسرح في يوم 12 جانفي موجودة...

القرّاء اللي يعرفوا المدوّنة يتفكروا الصراع اللي وقع ضد المتصهينين (*) (*)في ديسمبر 2008 و جانفي 2009 وقتلّي الكيان الصهيوني هجم على غزّة...أيّامتها الجميعة اللي يموتو في حبّ صهيونستان...أنا سميتهم وقتها "جماعة القحب المريش متاع اسرائيل بتونس" لان ابتذالهم و طحينهم يعملوا فيه لله الربّي...بلّوشي...

هالنهارات الجالية الصهيونيّة المقيمة بتونس رجعت تخدم بقوّة بمناسبة نقاش موضوع التطبيع مع اسرائيل في الهيئة العليا اللي اسمها طويل...هالكوازي وقفوا وقفة "سجاعة" مع امهم الحنينة اسرائيل و قالوا لا سبيل الى ان يقع التنصيص في ما سمي "الميثاق الجمهوري" على "عدم الأعتراف و التطبيع مع اسرائيل"...و اللي زاد الطين بلّه انو واحد من هالجميعة قالك "...مقاطعة اسرائيل موش من ثوابت الشعب التونسي..."

قل لي يا سي المغط اشكون فوضلك باش تتكلم باسم الشعب التونسي؟ ...برّه اسأل من بنزرت لبن قردان توه يقولولك التوانسة ...اللي اسرائيل كيان استعماري و عنصري .

و التوانسة اللي مشاو في 1936 و في 1948 لفلسطين لواش مشاو؟ و الشباب التوانسة اللي ماتوا من 1970 الى 2000 في فلسطين المحتلّة...علاش ماتوا؟ زعمة مشاو تورست !!!

… زايد استانستو انت و صاحبك متاع اللجنة العليا تسافروا بفلوس الصهاينة و تمشيو تمدّو في وجوهكم في جامعة Bar-Ilan... زايد رقع و شلايك...

الشعب التونسي ما لقاش فيكم الخير لا وقت الأستعمار وقتلي كنتو تنظرو ل"l’independance au sein de l’union" و لا ايّام كنتو تمارسو " l’entrisme" في صلب PSD و لا ايّام "المساندة النقدية" لنظام الدكتاتور المخلوع...

heureusement ...اللي عددكم ما يجيش عباية زوز كيران.

قالك افتتاح مهرجان قرطاج الصيفي باش يعملو لطفي بوشناق!!! ...يعجبكشي...

يا خي شكون العفاط اللي طلع بهالفكرة de tres mauvais gout ؟... قالك الحفلة "تحيّة فنيّة للثورة"...لاهايل برشة !!!

براس أمكم ياخي ما خطرش على بالكم... اللي هالفكرة مننّحة على الأخر؟... ياخي وزارة الثقافة ماهيش فاهمة انها تصرف في أموال الشعب ...واللي الشعب التونسي ذاكرة حيّة...

ما ثمة حتّى حد قال لهالوزارة اللي بوشناق متاعها ... من مناشدين الدكتاتور بن علي !!!

باخي نساو العريضة اللي امضى عليها بوشناق في اوت 2010 : "... من منطلق شعورنا بالمسؤولية تجاه وطننا ومجتمعنا وتطوره وبنائه وتوازنه واستقراره ومن أجل مستقبل لتونس أكثر قوة ومناعة واشراقا فاننا نسمح لانفسنا كوطنيين وبعيدا عن كل التصنيفات السياسية والايديولوجية أن ندعو حامل الامانة بكل صدق الى استكمال ما أنجزه." (*)

الوزارة بمأنها صرفت...راهي كملت استدعات محسن الشريف متاع "يحيى بيبي ناتانياهو" و السلام ...

الوزارة يلزمها تفهم اللي تحية الثورة لازم يقوموا بيها نساء و رجال(حتى اذا موش برشة) عانقوا الثورة ضد الأستبداد قبل 14 جانفي و قاوموا بن علي ،كل واحد حسب جهيدو، موش الطبالين و المناشدين مهما كانت قيمتهم الفنية. نطلب من كل المثقفين اللي قاوموا الاستبداد أنهم يتصداو لهذه العملية الرخيصة اللي من خلالها يحب البعض إعادة الاعتبار و المكانة لأزلام الاستبداد.

الصورة المصاحبة للتدوينة مأخوذة من حفل وقع نهار 26 اكتوبر2009 للإحتفال ب"انتصار" بن علي في "انتخابات" 2009 .