![](https://blogger.googleusercontent.com/img/b/R29vZ2xl/AVvXsEjzCIiCNMXu5BMo3NP_m1ixeQ3cJSKNaJ86anRE5KK5AoxvuL2FazbnTNt4MZihOB3hWZ2TZp-dyyjhjDuH43CxyPahJp3xXwNCcQrbI4VmXdpamDF7RSgKcvKOrCF6JzPFidg7Tuust94/s200/khadafi.jpg)
البارح كيف برشة توانسة تفرجت (الڤذافي في صراع مع ذبانة) في قناة "نسمة" على ديكتاتور ليبيا يحكي على ثورة تونس. من مدّة اسبوع كان يمجّد في بن علي...و اليوم اتقلب و ولّى يبندر و يمجّد. اوّل حاجة تبادرت لذهني هي انّو الشعبين التونسي و الليبي يلزمهم يناديو اليوم بصوت واحد : ڤذافي ... ديڤاج...
البشر هذا يلزمو يفهم اللي الشعب التونسي ما حاجتوش بنصايحو...ينفّخها و يشرب ماها...و ينزعنا... لانّو كلام من نوع " انو ما ياقع في تونس...يهمّني" يشبه برشة لكلام "جيفري فلتمان" و ما عادش يرهب الشعب التونسي .
يقول القائل اش مدخل قناة " نسمة " في هالهدرة...هالقناة يا قرّاء على ملك ناس (طارق بن عمار و سيلفيو برلوسكوني) يهمهم برشة انو الثورة الديمقراطية في تونس يقع الألتفاف حولها و اجهاضها...راكم... كيفي... لاحظتو "الأنفلاصيون" متاع الديمقراطيين هالأيام... "اب..اب..اب عالديمقراطي" كيما يقول رفيقي الشاعر سليم ساسي.هالقناة بحكم الصداقة بين برلسكوني و القذافي تسوق لحكومة الغنوشي و تقبل ان تبث انترفيو مدفوع الأجر.
و هاو عندي مقترح لهذه القناة : جيبو الليلة الكاميرات متاعكم و ايجاو اسمعو رأي شعب تونس في هالبذاءة اللي بثيتوها البارح...هاو الشعوب متاع الرڤاب و الكبارية و المكناسي وبوزيد و 5 ديسمبر و الرديف و تالة و الحامة و بن عون و حي الأكراد و المروج وتطاوين والكاف و منزل بوزيان الخ...الخ... تستنّى فيكم
bjr kissa re-bienvenu, je vois que tu es tjrs en forme