![](https://blogger.googleusercontent.com/img/b/R29vZ2xl/AVvXsEhUBGrBGj0M-yr-j4zupMm4Fz6ExhX3da5vq7M_3MFsY_-P8R71qnRwQio2vzhZfn8PyQBkV4uAjdJDot5f6SKAoVlT4qlLXsrzdfRBBG-PhUQo9BwgBaSNXPN570CZB2yrpuzxlKmtb6A/s200/pitbull2.jpg)
رشاد صاحبي، انسان موش نورمال...عندو حوينته متاع تصليح البلاستيك (باراشوك، ضوء متاع
كرهبه مكسّر...)فاناتيك من هاك المهبلة متاع فيراجultra متاع الترجّي. صحبتنا مثال يحتذى به متاع
التعايش السلمي بين واحد مكشخ مزبّل كيفو هو و واحد كلوبيست. يموت على الحديث في السياسة(الكبيرة موش الصغيرة). ديقوتا(كيما يقول هو) و حب يهجّ. وفي الأخر. قعد في تونس.
رشاد ، يكره سفيان الشعري و المسلسلات التركية و اسرائيل و العدس في الماكلة...و الناس اللي
ما تحبّش الكلاب. حضرة جنابو دكتور و باحث و مربّي متاع كلاب pittbull. المخ متاعي جوجمهولي
بالحكايات متاع الفرق بين "البيت" و "الصطاف" و "امصطاف" و طرق تربيتهم.
البارح و احنا قاعدين. وقفت كرهبه (كيما هاك اللي نشوفوهم في pimp my ride) ) كحلة وحمرة و قزوردي.
قعدت باهت كيفاش اعطاووها الفازيته(جماعة الفيزيت تكنيك انتيكه برشة في تونس)
هبط منها فرّادي، حتّى شيء ما يدلّ من هيتو انّو هو زاده مغروم بهالحكايات.
رشاد : تفضّل خويا؟
الراجل: بعثني ليك "بونبون" متاع حومة الستاد. عندي كلب نحب نشويه...
رشاد : كلّمني "بونبون" في الصباح. قّدّاش عمرو كلبك؟
الراجل : عام و نص
رشاد : شاركت بيه في مسيابه(كومبا متاع كلاب) و الا مازالت؟
الراجل : مرّه بركه... و شويه لا مات. يظهرلي ما عرفتش انربّيه ...اطلعلي كلب بطحاء...
خوكم قعدت كيف المرسيان في وسطهم حتّى تفاهمو على الكومبا و البقعة و التاريخ و البحّيمي...
و مشى الراجل متاعpimp my ride في "ديماراج امريكان".
قصّة : يا رشاد... شنية حكاية الشويان؟
رشاد : حكاية ساهلة ...حكيتهالك قدّاش من مرّه...الدولاب هاذى ولّى بزنس كبير..."الباس" متاع
ذكر "البيت" ب50 دينار و الجريّو في المنصف باي(سوق الحيوانات بتونس)ب50الى 80 دينار...
و الكمباوات توصل ل500 دينار...و اللي عندو وحش للبيع يقبض من مليون الى 2 مليون...
الراجل اللي كان هنا...عندو فرقة متاع موسيقى...و عامل زادا بزنس في "البيتبول"...و الشويان هو كومبا
بلاش خطار باش الكلب المضرّح يترانى مع كلب أقوى منّو من غير خطر كبير.
قصّة : برجوليّة...انتوما جماعة تربية كلاب البيتبول...جماعة سوفاج....
رشاد : زعمة...شكون اكثر تسوفيج...احنا و الا الفيتيرينار اللي يداويلنا كلابنا بعد الكومبا و اللي يبيعلنا في الدواء
و الا الذبابنية اللي يحضرو في الكمباوات و يقسمو معانا و الا اللي حاطط 4 بنات على الطرطوار والا الأخر الل يخدّم
في العباد ب110 دينار في الشهر؟
سكت و ما لقيت ما نقلّو...
يا قصة ، هي احلات القصة و انت قصيت ، علاه هكة كمل يعيش خويا
هي هي و سبّيت صاحبك : مكشخ مزبّل و فاناتيك
@عنصر
مرحبا بك في البلوق.سلّملي على شباب العلى
@غير معرف
كل حاجة في بقعتها
شنوه الفرق يا قصة بين السياسة الكبيرة والصغيرة؟
أهلا قصة
هههه عجب تو الحكايات هذي منتشرة في البلاد الكل؟ وكيفاش عندك قصة كيف هذي وساكت عليها والكمبا بين الكلاب أهو ظهر فيها تدريب ومقابلات وديّة ورسمية وفلوس ملا عالم؟؟؟؟؟؟؟؟؟ شكرا على التدوينة