قاللكم "بابي" السبسي...راهو الأجهزة الأمنية تعاني من مشكلة نفسية (بالفلاقي تحب تفشخ العباد و تعذب و حتى تقتل و ما يسائلها حد... مع في نفس الوقت تغطية قانونيّة)...

منذ ساعة تقريبا أوقف الفنّان و السينمائي الهاوي ياسر الجرادي... (مجموعة ديما...ديما ) بعد أن أشبع ضربا على اثر ايقافه داخل محلّ للانترنات في بطحاء برشلونة بتونس ، مع مجموعة من المواطنين...

يا فناني تونس و يا مثقفيها هبوا لنصرة مواطني و فناني بلادنا الموقوفين...

بعد مسيرات الأمس هبطنا اليوم الآلاف إلى الشارع في ڨفصة و سليانة و بنزرت و القيروان و ڨابس و جربة و زغوان و سوسة و صفاقس و تونس العاصمة باش نعبروا عن رأينا في حكومة السبسي و كمال اللطيف و بقية عصابة السرّاق اللي ما زالت تحكم في تونس و في اللي يحمي فيهم في داخل تونس و خارجها ...خرجنا عزّل لا عصي في يدينا و لا كوكتال مولوتوف... قوتنا شعاراتنا "الشعب يريد ...ثورة جديدة " "الشعب يريد إسقاط النظام" "الشعب يريد إسقاط التجمع" "يا سبسي يا جبان الشعب التونسي لا يهان"....و إيماننا أن ثورتنا ما زالت لان الدكتاتورية ما زالت في مكانها بالرغم من هروب الدكتاتور.

كل المسيرات مشات على ما يرام إلا في تونس العاصمة اللي شهدت من الساعة الواحدة و النصف هجوم بوليسي على المتظاهرين... من أشرس ما شفت في حياتي...لاكريموجان و هراوات و قضبان حديد... هالهجوم تضربوا فيه المواطنين التوانسة بمختلف أعمارهم بطريقة وحشية ... خمسة و ستة و مرات عشرة من كلاب الدم على راجل يفوت السبعين سنة أو شاب ما يفوتش العشرين عام تلاقاو عليه 4 أعوان في أعلى درجة من دروج المسرح البلدي...زيد اعطاوهم تعليمات... من شهر... أن يفشخو أي واحد يحمل كميرا أو آلة تصوير...

الشرطة(؟) كانت حاضرة من الساعة الثامنة صباحا بحشود كبيرة و مختبئة في الشوارع الجانبية...علاش؟

الأعوان(؟) بالزي كان اغلبهم يلبسوا بزّة فرق التدخل و فرق الحرس الوطني...

عدد غفير من الأعوان(؟) يلبسوا بزة زرقاء بدون إشارة و ملثمين ...اقصر واحد فيهم طولو 180 سم... من هم؟...هل ينتميوا للشرطة؟ إذا كانت الإجابة لا... من هم؟... إلى إي جهاز تابعين ؟...

شكون اعد الكمين الدموي متاع اليوم؟...

ايّا مبروك عليكم انتحاركم...

صدر في المجلة الألكترونية "نواة" يوم 1 ماي 2006 استجواب (*) تحدث فيه المنصف بن سا لم واحد من مؤسسسي حركة النهضة على علي الدوعاجي ... بكلام خطير يقول فيه... … »شكون هذا علي الدوعاجي اللي النصوص متاعو تستهزأ من شخصية "المؤدب" و تتقرّا للتلاميذ التوانسة... ثم يواصل… » الدوعاجي ينتمي لجماعة تحت السور...اللي كانوا يشربوا الشراب ( ما يحشموش... توه هاذي اعمال يعملوها؟) و يذبحوا القطاطس و ياكلوها (يا امميمتي هام كانيبال !!!) و يلمّوا بونتات السواڨر و يقولو "بوانت قوم عند آخرين سواڨر"… « و يختم المنصف بن سالم كلامو على علي الدوعاجي بالقول انه... متحصل على جائزة الأستحقاق الثقافي اللي منحهالوا الدكتاتور بن علي... و ما يذكرش ان الدوعاجي مات من عام 1949 .

يقول القائل علاش المنصف بن سالم ما يحبش الدوعاجي وجماعة تحت السور ؟

لانهم رموز لفترة تارخية من النهضة الثقافية و السياسية : ابو القاسم الشابي،الطاهر الحداد،الهادي الجويني،عبد الرزاق كرباكا، خميس الترنان،صليحه،السنوسي،صالح الخميسي،

يكره هالناس هاذم و نتصوروا يكره ايضا المعري و ابن رشد و ماركس و ابو نواس و فولتير و نيتش و البيروني...و غيرهم...

انا اقترح عليه ان يتلها بقوانين الرياضيات متاعsiegel bauer- و heine-borel و lindermann و methode de ferrari و reciprocite quadratique

و يسيب عليه من الكلام على الأدب... لان حديثو على الدوعاجي معلومة اضافية على العداء متاعو للفكر الحر و التقدمي و النير و العقلاني و العداء اللي عندو لكل المفكرين و المبدعين اللي عندهم مخ في دماغاتهم... و موش ياجورة ...

علمنا في آخر العشية ان "الحراقة" التونسيين و الليبيين القادمين من لمبدوزة و الذين تحصنوا داخل عمارة فارغة بشارع سيمون بوليفار بباريس، وقع اخراجهم بالقوة و اقتيدوا الى مركز شرطة يقع porte de .clingnancourt و يبدو ان عددهم 146.