الثلاثاء، 6 سبتمبر 2011





هالأيامات كثر اللغط حول موضوع "استفتاء" يطالبوا به البعض ...

تلقى في هالجميعة هاذم : "عياض اللومي" تجمعي و محرك "التآلف الجمهوري" المتكون من 41 حزب تجمعي... هالفاشي كان وعد الشعب التونسي بحمام دم في افريل 2011 ...و "محسن مرزوق" موظف في مؤسسة FREEDOM HOUSE التابعة ل CIA و "نوفل الزيادي" (من الحزب اليساري) و هو اللي نظم انقلاب جمعية الصحافيين في 2009....و فمة حتى مدون سابق، حالل جلغتو على فايس بوك...لاعبها "شالق" و "فاهم كل شيء" و "بوها" و "وليدها" و "مازمبي" كيما يقول هو، يفتي و يحلل و يعاود في نفس الكلام اللي يقولوا فيه "اللومي"... و باعث القناة اللي البارح يسبح بحمد سيدو بن علي و اللي من 5 اشهر حالل حملة على الأحزاب...

قالك يا سيدي "يلزم استفتاء لان الشعب التونسي ما يحبش يعطي شاك ابيض للمجلس التأسيسي"

يا خي انتم تدبرو على امّو الشعب يعطي و الا لا "كارت بلانش" للمجلس التأسيسي؟ تعتبروا انفسكم اوصياء عليه؟ هاكم كلكم "براسك" كنتو من ازلام بن علي و اكبر سند لدولة الأستبداد...جايين اليوم تطالبوا باستفتاء؟

ما نيش باش نقوللكم براوا اقراوا "مونتسكيو" و "روسو" و "كاري دي مالبرغ"...لان الأغلبية متاعكم عقوبة الله...

يزيوا من استغفال الناس...المجلس التأسيسي مطلب شعبي من يوم 14 جانفي 2011( و حتى من قبل اذا اعتبرنا ادبيات حزب العمال من 1992 و حزب المؤتمر بعد2005)... ثبتو مليح في التصاور...

شكونكم حتى تحددوا الصلوحيات متاع المجلس؟...هو السلطة الأصلية... نعم الأصلية... و اللي يقول كلام مغاير... فاشي و يحب يرجع بينا التالي...

بربي فهموني... ياخي الشعب اللي باش تعملوا به استفتاء باش تجيبوه من بوركينه فاسو و الا من جزر السيشال؟...

و الا على خاطر حسيتو انكم باش تطلعلكم قرعة ؟ و باش ما يقعد لكم كان صبع القابلة ؟

هالفصائل المقلّبة موش قابلين فكرة ان لا ديمقراطية بدون الاحزاب و الجمعيات( و بالأخص باعث القناة و هاك المكين طارق المكي)...

نهار اللي الشعب باش يعطي ثيقتو في ناس معينين...توه تضربولو على الطيارة...اعملوا مظاهرة قدام الكوبول ...

و اذا المجلس المنتخب من طرف الشعب التونسي دورها ملكية... توه ننصبولكم ملك...

و توّه تتعرضولنا...