السبت، 27 أغسطس 2011



بعد "الأتخاد الوطني الخر طر"

هاو حزب "الوطن...و السماء...و الوطاء لينا... "

برعاية موصولة من لدن رئيس الحزب يوزع، لله في سبيل الله،شوية معونات على عائلات معوزة و ذلك في اطار المد التضامني ( يا ن...! يا ن...!) بمناسبة حلول عيد الفطر المبارك (يلعن بو طحينكم)



الأحد، 21 أغسطس 2011



يا سعدنا يا هنانا ....

الأتحاد الوطني جاءنا ...
في حي الرياض بسوسة


الخميس، 18 أغسطس 2011



خطاب أجوف...لرئيس حكومة لا شرعية... صورة باهتة لبن علي...اشكال خطابية (متاع بورڨيبة) بالية... اربعة ڨعامر كبار يسمعوا فيه كي البهالل (يا جماعة القطب "الحداثي"..)... صحافيين يضيحكوا(البارح اغلبهم يطبلوا و يمجدوا في الدكتاتور) مهزلة بأتم معنى الكلمة...

قالك "الحكومة هي اللي تحمي في الثورة"... يعجبكش؟

توه شفنا كتائب السبسي تكسر في سيارات الناس،و تشعل في نار بين العروش،و تولع في الفتن الطائفية و تضرب بالحجر و تهرب في السيدة العڨربي و تسيب في التكاري... في انتظار انها تهبط الدبابات نهار 24 اكتوبر اذا اتقلب عليها الطرح...

و اليوم هاي "تحمي في الثورة"... زايد ... قمّة الترهدين و الكذب ...الفاشي.

الله يرحم فمك يا متنبي :

مات في القرية كلب استرحنا من عواه

خلّف الملعون جروا فاق في العواء أباه



الأربعاء، 17 أغسطس 2011


هالايامات فقت اللي موقع " tunisia-sat.com " حط مقالي حول ipemed (*) بدون استشارتي و هذا يتسمى قرصنة يعاقب عليها قانون حقوق الملكية الأدبية

المضحك في الأمر ان جماعة "تونيزياسات" تطلعوا من جماعة "الجالية الصهيونية المقيمة بتونس"

انا في النص متاعي كتبت "صهيونستان" و هوما عوضوها ب "اسرائيل"

قصة اون لاين : "و المشكلة الثالثة هي ان عياض بن عاشور اللي في تونس يرأس هاك اللجنة العليا اللي أسمها طويل...جالس يا بو ڨلب في نفس الهيئة(*) مع يوسي بيلين وزير خارجية مساعد و وزير العدل في صهيونستان سابقا....

اش قولكم في هالخنّار؟؟؟؟؟؟"

تونيزياسات :"و المشكلة الثالثة هي ان عياض بن عاشور اللي في تونس يرأس هاك اللجنة العليا اللي أسمها طويل...جالس يا بو ڨلب في نفس الهيئة(*) مع يوسي بيلين وزير خارجية مساعد و وزير العدل في إسرائيل سابقا...
اش قولكم في هالخنّار؟؟؟؟؟؟"







Voici 2 photos prises Place Mohamed Ali à Tunis, à 8 mois d'intervalle...un petit effort... trouvez les differences


الاثنين، 15 أغسطس 2011



محمد هشام المؤدب الناطق الرسمي باسم "وزارة الداخلية /وزارة ارهابية" بتونس صرّح اليوم بعد المجزرة اللي حلّوّها اعوان فرق التدخّل متاع الحرس في المواطنين في شوارع تونس العاصمة، ان الفرق ما سيبت الغازات و طاردت المتظاهرين(موش فشخت) الا بعد ما اطلق واحد من المتظاهرين قنبلة لاكريموجان على اعوان الحرس...

توه هذا كلام !!!

يا سي هشام... اعمل كونفرانس دي براس اخرى و جيب "لهڨه" احسن...

بالنسبة لي الحكاية هاذي ما تجدش حتى على الفروخ متاع 7 -10 سنين... و تسمى "استحمار المواطنين"

و الخرافة هاذي ما تقبل كان 3 حلول :

- 1/ اذا فمة لاكريموجان اترمات على الحرس...ما يكون كان بوليس من سلامة امن الدولة او حرس او بوب رماها...و الا واحد ذبابني يخدم معاكم و "الڨريناد" انتم اعطيتوها....

- 2/ الحكاية خر طر و ما فماش منها...

- 3/ الحكاية صحيحة...و بمانك بوليس براس الحنينة قول لنا وين يتباعوا الاكريموجان ...خلينا نريڨلوا امورنا...

و الأرجح ان ما قلته في ندوتك الصحفية "كذب مفلق ... طاح الكوز و قعد الزيت معلّق"