الخميس، 22 أبريل 2010



الكتاب اللي تشوفو في تصويرتو عبارة على مجموعة متاع وثائق رسمية من الأرشيف التونسي متعلّقة بثورة 1864 اللي قادها "علي بن غذاهم"، كتبو سي توفيق البشروش تحت عنوان "ربيع العربان".

في هالكتاب وثائق من أرشيف الدولة التونسية، و منها "الدفتر 3156" اللي فيه جرد للمهن الأصلية متاع 1794 عسكري و ضابط اللي متكون منهم الألاي الثاني( 2ieme regiment ) المتمركز في مدينة سوسة بتونس في 13 جانفي 1859.

في هالجرد مثلا نلقاو 658 "حرّاثة"...و 104 "خدّامة الحلفة يفتلوا و يضفروا"...و32 "حجّامة و يفصدوا الدم"...و 42 "خدّامة بالحزام"(النص ما يوضحش بصحة البدن و الا بالرهيز)...و 14"صيّادة بكلاب الشوك" ...و 2 "طبّالة"...و 7 "غنّاية"...و 11 "عوّامة"...و 29 "عيساويّة"...و برادعيّة و كواشة و حوّاتة و "نجارة بيّوضي"... و 58 "يقراو و يكتبو"( من اصل 1794 نفر يشكلو الألاي يعني 3،2 % بما فيهم الضبّاط)...و 1 طبيب...و 5 مهندسين( بكل تأكيد ضبّاط) ...

و في الجرد : 5 سرّاق...

هكذا... بصريح القلم...



تعليق Unknown

قداش لعباد كانت نيّة...



تعليق esperantiste

comme ça ils ont repondu qu'ils ete voleurs!moi et mes ami sa m'a marré.je lis tout ce ke tu ecris .laisse tomber ce connard de halbouda tout le monde sait que c'est un moutanasser



تعليق غير معرف

وين نلقى هالكتاب؟



تعليق kissa-online

@esperantiste
مكشّخ...شو هاك العملة...واحد من عمومتي عم عمر كان يقول عالمكشخين... جماعة ربط المصران(باب سويقة،سوق الززّارة و نهج الكبدة)
"متنصر"هذا امر ما يهم كان هو(راهو ريقي شاح من المعاودة)المشكلة انو داززها "لا ديني" و يبرّح نهار الكل على امو الحنينة اسرائيل و يقول ان احتلال العراق تحرير.
@anonyme
هاو معرض الكتاب جاء.امشي لجناح "بيت الحكمة"